UKAWA WAMSHUKIA ZITTO,WAMTAKA ASIWAINGILIE,WASEMA UKAWA HAITAKUFA KAMA YEYE NA CCM WANAVYOTAKA


 



Mbunge wa Kigoma Kaskazini, Zitto Kabwe

Na Patricia Kimelemeta

UMOJA wa Katiba ya Wananchi (Ukawa), umemtaka Mbunge wa Kigoma Kaskazini, Zitto Kabwe (Chadema), kuacha kuwaingilia kwenye mambo kwa vile hayamhusu.

Kauli ya Ukawa imekuja siku moja baada ya Zitto kusema hana uhakika na wala haamini kama umoja huo utakuwa endelevu hadi uchaguzi mkuu mwaka 2015, kwa sababu si mara ya kwanza vyama vya upinzani kuungana kisha kugawanyika.


Alisema siku zote Watanzania wanapenda kuwa na upinzani imara ambao watu wanaweka maslahi yao pembeni na kuungana dhidi ya chama kilichopo madarakani.

Akizungumza na MTANZANIA mjini Dar es Salaam jana, Katibu Mkuu wa Chama cha Demokrasia na Maendeleo (Chadema), Dk. Willibrod Slaa, alisema haoni umuhimu wa kujibizana na mtu aliye nje ya umoja huo kwa sababu hawezi kujua dhumuni la kuungana.

“Hatuhitaji kuumiza kichwa wala kujibizana na mtu aliye nje ya Ukawa, kwa sababu hajui ulianzishwa kwa lengo gani, atabaki kutabiri kitu ambacho hana uhakika nacho, bali anazungumza kutokana na matakwa yake.

“Kwanza si msemaji wa Ukawa, tunashangaa hata kukaa na kuanza kujadili suala lisilomhusu, ni nani na ninyi waandishi wa habari mnapaswa kumuuliza maswali wakati akizungumza hayo,” alisema Dk. Slaa.

Alisema Ukawa haufanyi kazi kwa kufuata maneno ya barabarani, bali wanafanya kazi kwa vitendo, ikiwa ni pamoja na kusikiliza maoni ya wananchi nini wanataka ili waweze kuyafanyia kazi.

Alisema tangu kuanzishwa kwa umoja huo, wamekwenda zaidi ya mikoa 17 na majimbo yake ili kusikiliza maoni ya wananchi ambayo wameyachukua na kuyafanyia kazi, hivyo basi hawana muda wa kukaa na kujadili kauli za watu zinazotolewa barabarani za kujadili masuala yasiyowahusu.

“Sisi tunafanya kazi na Watanzania, hatufanyi kazi na mtu mmoja mmoja, ndiyo maana tulikwenda mikoa 17 na majimbo yake kwa ajili ya kuwaelezea umoja wetu na mikakati tuliyopanga ndani ya umoja huu, hivyo basi hatuna nafasi ya kujadili kauli ya mmoja mmoja,” alisema.

Alisema kutokana na hali hiyo, viongozi wa umoja huo hawawezi kuishi kwa imani, bali wanafanya kazi kwa vitendo ili wananchi waweze kuwahukumu katika uchaguzi ujao.

Alisema Ukawa haupo kwa ajili ya Katiba peke yake, bali ni kuangalia maslahi ya wananchi katika nyanja mbalimbali za kiuchumi na kijamii ili kuhakikisha wanaondokana na hali ngumu ya maisha na kupata mafanikio.

Alisema mkakati uliopo ni kuhakikisha malengo hayo yanatekelezwa kwa vitendo ili wananchi wenyewe waweze kuwanyooshea vidole kwenye chaguzi zijazo.

Naye Katibu wa Ukawa ndani ya Bunge, Julius Mtatiro, alisema mawazo ya mtu yanapaswa kuheshimiwa, lakini umoja huo hauwezi kufanya kazi ya utabiri kama utaendelea au kuvunjika.

“Ukawa hauwezi kufanya kazi ya utabiri, kwa sababu tulipoungana tulikuwa na malengo ya dhati, ikiwa ni pamoja na kuondoa tofauti zetu na kuangalia maslahi ya wananchi na si kauli ya mmoja mmoja, japo naheshimu mawazo yake,” alisema Mtatiro.

Mtatiro alitolea mfano kwa kusema kauli ya Zitto ni sawa na falsafa ya Chama Cha Mapinduzi (CCM), ambayo wamekuwa wakitangaza kila kona kuwa upinzani Tanzania unaelekea kufa wakati si kweli.

WAJUMBE

Katika hatua nyingine, Ofisi ya Katibu wa Bunge Maalumu la Katiba imewataka wajumbe wa Bunge hilo kuwasili Dodoma Agosti kwa ajili ya kuanza mkutano huo kama ulivyopangwa.

Taarifa iliyotolewa kwa vyombo vya habari mjini Dar es Salaam na ofisi hiyo, ilisema Bunge Maalumu la Katiba linatarajia kuanza vikao vyake Agosti 5, mwaka huu mjini Dodoma.

Taarifa hiyo ilisema Agosti 4 itakuwa siku maalumu kwa ajili ya mambo ya kiutawala, hivyo wajumbe wote wanapaswa kufika Ofisi za Bunge Dodoma kuanzia saa 4:00 asubuhi.

Maoni

Chapisha Maoni

Machapisho maarufu kutoka blogu hii

Nani aligharamia ukarabati wa kifahari wa ofisi ya Mkuu wa mkoa

Picha
Picha zimekuwa zikisambaa kwenye mitandao kuonyesha ufahari wa hali ya juu wa ofisi ya Mkuu wa mkoa wa dar es salaam. Ofisi hiyo imekuwa tofauti kabisa na ile ya Mkuu wa mkoa aliyepita bwana Sadick, ofisi ya Makonda ina kompyuta kadhaa za apple,mapambo mengi ya kila aina yanayoashiria ufahari na utukufu wa hali ya juu kuliko hata ofisi ya rais. Nani aligharamia ufahari huu wakati hata ikulu haijabadili muonekano? Kulikuwa na umuhimu wa kuweka ufahari huo katika kipindi hiki cha kubana matumizi? Nini kilipungua katika ofisi ya aliyekuwa Mkuu wa mkoa mpaka ufahari uongezwe katika jiji ambalo limezungukwa na wananchi wenye hali ngumu na maisha yasiyoridhisha. By iparamasa
Endelea kusoma

Abu Bakr al-Baghdadi: Nguo ya ndani ya kiongozi wa IS 'iliibiwa' kufanya uchunguzi wa DNA

Picha
Haki miliki ya picha Image caption Vikosi vya muungano vya Syria (SDF) vinavyoongozwa na wapiganaji wa Kikurdi vinasema majasusi waliiba nguo za ndani za Abu Bakr al-Baghdadi ambayo ilitumiwa kufanya uchunguzi wa chembe chembe za vinasaba, DNA kabla auawe. Kamanda wa mwandamizi wa SDF Polat Can anadai kuwa wapelelezi wao walichangia kwa kiasi kikubwa juhudi za kupata maficho ya kiongozi wa kundi la Islamic State (IS) kabla ya oparesheni ya vikosi maalum vya Marekani nchini Syria. Serikali ya Tanzania yalaumiwa kuhusu wakimbizi wa Burundi Asili ya binaadamu wa leo 'yagunduliwa Botswana' Rais mstaafu Kenya atibiwa hospitalini, sio mara ya kwanza Baghdadi alijilipua na kujiua mwenyewe wakati wa oparesheni ya kumsaka. Marekani imepuuza jukumu la vikosi vya Kikurdi katika oparesheni hiyo. Akizungumzia oparesheni hiyo Oktoba 27, Rais wa Marekani Donald Trump alisema vikosi hivyo "vilisaidia" kutoa habari lakini akaongeza hawakufanya ''jukumu lolote ...
Endelea kusoma